Óréttlæti í fótboltanum

Ég rak augun í það í dag að leik BÍ/Bolungarvíkur og Tindastóls í 3. deildinni sem fara átti fram í dag var frestað þar sem Tindastólsmenn gátu ekki flogið vegna veðurs. Vestfirðingar vilja þó meina að allt áætlunarflug hafi  flogið vestur í dag en það þekki ég af eigin reynslu að Tindastólsmenn stjórna ekki ákvörðunum leiguflugvéla.

En það sem mér liggur helst á hjarta er að einn leikmaður Tindastóls sem hefði spilað í dag verður í banni á morgun þegar leikurinn fer fram. Þessi leikmaður sem heitir Dejan Djuric var dæmdur í bann á þriðjudag vegna gulra spjalda og tekur bannið gildi á morgun á hádegi. Svo sem ekkert óeðlilegt við þá refsingu. Þetta á einnig við um Sigþór Snorrason leikmann BÍ/Bolungarvíkur.

Það sem er óeðlilegt er að það kemur niður á leikmanninum að leiknum er frestað. Hann var löglegur í dag en ekki á morgun. Í þeim íþróttum sem ég hef fylgst með, sérstaklega körfubolta, er það þannig að ef leik er frestað vegna veðurs eða annarra náttúruhamfara þá eru þeir löglegir þegar leikurinn er leikinn, sem voru löglegir þegar leikurinn var upphaflega settur á.

Tökum dæmi. Á þriðjudegi er Helgi Sigurðsson Valsari dæmdur í bann, bannið tekur gildi á föstudag. Valur á leik við FH á fimmtudag, toppslagur í deildinni og mánudaginn á eftir á Valur að spila bikarleik við Snört á Kópaskeri. Helgi verður því í banni í þeim leik. En á fimmtudag ríður jarðskjálfti yfir höfuðborgarsvæði ð og því ekki hægt að leika leik Vals og FH. Hann er settur á á föstudag, obbs, nú er Helgi í banni á móti FH og getur spilað gegn Snerti.

Það er líka gamaldags að aganefnd dæmi á þriðudegi og bann taki gildi á hádegi á föstudegi. KKÍ breytti þessu nú í vor og þar tekur bann gildi á hádegi daginn eftir að er dæmt.

Þetta finnst mér mjög óeðlilegt.Vil taka það fram að þó ég sé Skagfirðingur og beri því einhverjar taugar til Tindastóls þá hefði ég skrifað þennan pistil hvenær sem er um hvaða lið sem er.

Mér finnst þetta óréttlátt.

Athugasemdir

[Eyþór Árnason, 13.9.2007 kl. 22:39]

Já það er margt skrítið í heimi íþóttanna. Þeir hefðu til dæmis átt að "teipa" betur hringinn hans Hermanns. Og nú má kannski vitna í vísuna: "...heldurðu ekki hringinn þinn/ ég hermannlega bæri?"  Kveðja úr Vesturbænum.

[Bolvíkingur (IP-tala skráð) 14.9.2007 kl. 09:42]

Það var flogið á alla staði landsins í gær. Það var aldrei bókað leiguflug frá Sauðárkróki á Ísafjörð. Tindastóll lét flugfélagið hafa sig að fífli. Auk þess er um klst. akstur á Akureyri og þaðan hefði verið hægt að fljúga leigufluginu ef vélin hefði einhverntíman verið til.
Hins vegar þarf leikmaður BÍ/Bolungarvíkur sem kom með flugi til Ísafjarðar í gær að líða fyrir þessa vitleysu hjá flugfélaginu og kæruleysi Tindastólsmanna að hafa ekki kannað málin tímanlega.

[Rúnar Birgir Gíslason, 14.9.2007 kl. 15:57]

Góður þessi Eyþór, kannski var Þorsteinn Erlingsson forspár.

Bolvíkingur, það kom kannski ekki nógu skýrt fram að ég er ekki endilega að gagnrýna þennan ákveðna leik, heldur reglur KSÍ, mér finnst þetta ósanngjarnt hvenær sem er.

En það er aldrei hægt að kenna Tindastól um að leiknum var frestað, mótanefnd KSÍ ákveður að fresta. Ef Tindastóll klikkaði eitthvað á samskiptum við leiguflug þá hefði mótanefnd að dæma þeim leikinn tapaðann. Það ákveður mótanefnd ekki og því er leiknum frestað vegna veðurs. Hvernig var með dómarana, komu þeir vestur? Þeir áttu að fljúga úr Reykjavík.

Það er mín reynsla eftir að hafa dæmt körfubolta í mörg ár og þurfa að fljúga oft út á land, m.a. oft á Ísafjörð, að maður kannar alltaf ferðaplan aðkomuliðsins og samræmir það við dómara svo ekki komi upp sú staða að annaðhvort dómara eða aðkomulið vanti.

En minn punktur var, reglur KSÍ eru gamaldags og gallaðar að mínu mati.

[Magnús Þór Jónsson, 19.9.2007 kl. 14:05]

Alveg sammála þér Rúnar.

Sem gamall markmaður utan af landi var með ólíkindum þreytt þegar maður lenti í veseni vegna dómara, þegar liðin voru bæði tilbúin.

Lenti t.d. einu sinni í því að annar aðstoðardómarinn átti að koma austur að sunnan til að flagga línu hjá okkur.  Hann afboðaði sig ekki og svaraði engum síma.  Við þverneituðum að fara aftur norður án þess að spila og á endanum tókst að grafa upp gamlan boltajaxl, án dómararéttinda, til að flagga!

Svo er ég sammála þér með aganefndarfundi.  Þetta er bagalegt bull, og á tímum tölvusamskipta á bara að vera sjálfkrafa staðfesting að við ákveðinn fjölda gulra spjalda komi leikbann í næsta leik.  Það er hægt með rauð spjöld og á að sjálfsögðu að vera einfalt með gul.  Hef mjög oft lent í því að leiktími fyrir eða eftir hádegi á föstudegi breyti leikbönnum andstæðinga minna eða samherja.  Sem er auðvitað bull!