Aflæst

Mikið þykir mér þetta orð, aflæst, vera ljótt. Ég þurfti að lesa fréttina nokkrum sinnum til að skilja hana.

Aflæst er mjög líklega bein þýðing af orðinu unlocked, ólæstur sem er algeng þýðing af því eða bara opinn.

Ég var lengi að skilja hvort um var að ræða síma sem fólk hafði notað ólöglegan hugbúnað til að opna símana eða þá sem höfðu ekkert af sér gert.

Ég hélt semsagt við fyrsta lestur að þessi hugbúnaðaruppfærsla hafi lokað hjá þeim sem ekkert höfðu af sér gert.

Svona getur þetta verið þegar verið er að þýða beint.

Hugbúnaðaruppfærsla frá Apple gerir aflæsta iPhone síma óvirka

Athugasemdir

[Árni Gunnarsson, 28.9.2007 kl. 18:19]

Sammála. Þetta rugl er komið inn í málið og verður þar líklega. Þetta er gamalt og ég hef heyrt fólk sem fætt var í byrjun tuttugustu aldar tala um að aflæsa. Bein merking er auðvitað þverstæðan eins og þú bendir á. Maður læsir dyrum, tekur síðan úr lás= aflæsir.

[Ingólfur, 28.9.2007 kl. 19:01]

Hvað um "þráðlausan síma"?

Man eitthvað hvaðan orðið sími kemur?

[Árni Gunnarsson, 28.9.2007 kl. 23:26]

Ekki man ég betur en að merking orðsins sími sé þráður. Þráðlaus sími er þá þráður sem þráðinn vantar í ef þetta er rétt. En auðvitað er sími orðið nafn á þessu fyrirbæri fjarskipta.

 það er margt skrýtið í kýrhausnum og nóg er nú af þeim.

[Maggi (IP-tala skráð) 29.9.2007 kl. 01:24]

Það er verið að taka læsinguna af símanum, það er semsagt verið að aflæsa honum! Ekki nein eldflaugavísindi í gangi hérna.

Ólæstur er sími sem var aldrei læst, en aflæstur sími er sími sem er búið að taka læsingu af

[áhugasamur (IP-tala skráð) 29.9.2007 kl. 10:13]

Var ekki fyrsti síminn á Íslandi frá Siemens? Siemens -> Sími? 

já, ég varð líka að lesa fréttina oftar en einu sinni...

[Ingólfur, 29.9.2007 kl. 12:24]

Orðið sími er ekki dregið frá Siemens heldur eins og Árni nefndi er merking orðiðs þráður (eða band)

Sjá hér .

Þessvegna er það þversögn að tala um þráðlausan síma. Einu sinni heyrði ég lagt til að þráðlausir símar yrðu kallaðir ólínur og hefur mér alltaf litist vel á það.

Eins verður það að teljast undarlegt að tala um að eitthvað sé aflæst. Orðið ólæst gefur í skyn að það geti líka verið læst og það er síðan útskýrt í fréttinni að iPhone sé seldur læstur. Ef það vantar eitthvert nýtt orð þarna að þá á það líklega að hafa merkinguna "brjóta upp/brjótast inn í síma".

Fyrirsögnin í fréttinni hefði t.d. líklega verið skýrari ef hún hefði verið svona: Hugbúnaðaruppfærsla frá Apple gerir ólæsta iPhone síma óvirka

[Bjössi Arngríms (IP-tala skráð) 5.10.2007 kl. 00:50]

Ég er sammála því að það sé erfitt að segja að eitthvað sé aflæst því þá er það vitanlega ólæst.  Hins vegar ef eitthvað er læst og er svo tekið úr lás þá má svo sem segja að þar sé komin sögnin að aflæsa yfir þá aðgerð (sem er skárri en sögnin að úrlæsa)